చలన చిత్రాల నిర్మాణంలో ప్రపంచం మొత్తం మీద రెండో స్థానం ఇండియాది. ఇండియాలో రెండోస్థానం తెలుగు వాళ్ళది. మన దేశంలో ఏటా సుమారు 600 కథా చిత్రాలు (ఫీచర్ ఫిల్ములు) తయారౌతున్నాయి. వీటిలో దాదాపు వంద చిత్రాలు తెలుగువి. ప్రాంతీయభాషల జనాభాలను, ఆ భాషలలో విడుదలవుతున్న చిత్రాల సంఖ్యలను పోల్చి చూస్తే అగ్రస్థానం తెలుగువాళ్ళదే.
ప్రపంచం మొత్తం మీద జనాభా విషయంలో మన దేశానిది రెండో స్థానం. కథా చలన చిత్రాల ఉత్పత్తిలో కూడా మనది రెండోస్థానం. మన అరవై కోట్ల జనాభాలో దాదాపు 24 కోట్ల మంది బాలబాలికలున్నారు. అయితే మన దేశంలో ఏటా ఉత్పత్తి అవుతున్న సుమారు 600 కథాచిత్రాలలో బాలల చిత్రాలని చెప్పుకోదగినవి రెండు మూడైనా ఉండడం లేదు. మనకంటే ఎక్కువ చలన చిత్రాలు నిర్మిస్తున్న జపాన్ లో పిల్లల కోసం ఏటా బోలెడు చిత్రాలు నిర్మిస్తున్నారు. ఇంతా చేసి జపాన్ జనాభా మన జనాభాలో ఆరోవంతు మాత్రమే.
క్రిందటి సంవత్సరం తెలుగులో తొంభై పైచిలుకు చలన చిత్రాలు విడుదలైనాయి. ఈ ఏడాది తెలుగు చిత్రాల సంఖ్య వంద దాటిపోతుందని అంచనా. రాసిలో దేశం మొత్తం మీద హిందీ చిత్రాల తర్వాత మనదే పైచేయి. వాసిలో కూడా మనం ఎవ్వరికీ తీసిపోమని మన చిత్ర నిర్మాతలు, దర్శకులు, ఫిలిం జర్నలిస్టులు భరోసా ఇస్తున్నారు. అట్టేమాట్లాడితే మనం, కళాఖండాలను గురించి బెంగాలీ, మళయాళీ, కన్నడ చిత్ర దర్శకులకు సైతం పాఠాలు చెప్పగలమని జబ్బచరిచి చెబుతున్నారు.
ఫిలిం అవార్డులు పంపిణీ చేసే ప్రైవేటు సంస్థలు ఈ మధ్య దేశమంతటా కుక్కగొడుగుల్లాగా మొలుచుకొస్తున్నాయి. జాతీయస్థాయిలో కేంద్ర ప్రభుత్వం, రాష్ట్ర స్థాయిలో వివిధ రాష్ట్ర ప్రభుత్వాలు ఇస్తున్న అవార్డులు చాలక, చలన చిత్ర పత్రికలు, క్లబ్ లు, విమర్శకుల సంఘాలు, ప్రేక్షక సంఘాలు, హీరోల అభిమాన సంఘాలు కూడా యథాశక్తిని అవార్డులు ప్రదానం చేస్తూ తమ ''చలనచిత్ర కళాభిమానాన్ని'' చాటుకుంటున్నాయి. ఇదంతా తేలిగ్గా డబ్బు చేసుకునే మోసకారి వ్యాపారంగా తయారయిందని ఈ మధ్య కేంద్ర సమాచార మంత్రి శుక్లా ఘాటుగా విమర్శించారు. అయితే, ప్రైవేటు అవార్డులను నిషేధించే ఉద్దేశం ప్రభుత్వానికి లేదని ఆయన చెప్పారు.
బాలల చలన చిత్ర సంఘం ఆధ్వర్యాన ఈ మధ్య ఢిల్లీ, బొంబాయి, మద్రాసు, బెంగుళూరు నగరాలలో అంతర్జాతీయ బాలల చలన చిత్రోత్సవం జరిగింది. మన దేశంలో పిల్లల కోసం ప్రత్యేకంగా చలన చిత్రోత్సవం నిర్వహించడం అపూర్వం కాకపోయినా అపురూపం. ఈ చలన చిత్రోత్సవం బెంగుళూరులో పదిరోజులపాటు-కబ్బన్ పార్కులోని 'బాలభవన్'లో జరిగింది. ఇండియాతో సహా 15 దేశాలకు చెందిన 27 చిత్రాలు ప్రదర్శించబడినాయి. వాటిలో పది ఫీచర్ (పూర్తి నిడివి కథా చిత్రాలు) ఫిల్ములు-అంటే సుమారు గంటన్నర సేపు నడిచే చిత్రాలు. మిగిలినవి చిన్న చిత్రాలు. అంటే 20 నిమిషాలలోపు చిత్రాలు. వీటిలో కొన్ని మరీ చిన్న చిత్రాలు. రెండు మూడు నిమిషాలవి కూడా ఉన్నాయి.
ఈ మధ్య మన దేశంలో కూడా 'కళాఖండాల' పిచ్చి వెర్రితలలు వేస్తోంది. ఈ పిచ్చి ఆనవాయితీ ప్రకారం ముందు హోలీవుడ్ లో పుట్టి, అక్కణ్ణుంచి మన దేశానికీ, మన రాష్ట్రానికీ దిగుమతి అయింది. 'కళాఖండాలు' అంటే ఉత్తమ చలన చిత్రాలకు మన మేధావులు పెట్టుకున్న ముద్దుపేరన్నమాట. (అంటే ''కళను నరికి పోగులు పెట్టిన ముక్కలు'' అని అర్థం).
Copyright © 2021 nanduri.com | All Rights Reserved | Site designed and maintained by CodeRhythm Works